عمر البشير مكمل الرجالة وهو والد جميع السودانيين

✍️ الناشطة تبيان توفيق تكتب :

أيام المظاهرات والثورة كنت برجف من الغضب والزعل لمن أشوف صورة البشير وأسمع كلام عنو لأنو كان عندي معتقد كبييير(برمجة) إنو البشير دا هو الشيطان الرجيم وأنو هو سبب الدمار وإنو هو الطاغية والجبار وإنو هو ملك الموت وإنو هو رمز الفساد وإنو هو الماسك العُملاء في العالم وإنو هو الإرهاب والخراب والجًدب والقحط وإنو هو سبب الدمار الشامل الحصل في السودان!!
وعلي كده بقيت أنوم وأقوم وأمشي وأجي لحدي ما جات الثورة وجات ديسمبر وجا تجمع المهنيين وقوى الحريه والتغيير وبقينا ندعم ونتظاهر ونترِّس ونموت ونناضل ونهتف ونعتصم عشان البشير دا يسقط
عشان البشير يتشنق عشان البشير دا يطير من وشنا عشان البشير دا حرامي وسرّْاق ونهّاب وجبان
وباع السودان
ودمر التعليم والصحة والزراعة وشتّت دارفور ومنع الحركات المسلحة تخُش الخرطوم عشان البشير دا عُنصري ومغرور وكل البلاد هي دارفور
عشان الغلاء والجوع والوضع الإقتصادي
عشان السودان دا مفترض يكون جنة الله في الأرض!!
✍️ كل دا كان معشعش في عقلي تجاه البشير كشخص..
لحدي ماسقط وفرحنااااا
وقلنا خلاص حتبقي الدنيا وردية وبقت بمبية ومُضلِّمه!!
من ناحية خلاف سياسي اتمنيننا المحكمة تكون شجاعة وتقدر تدير الملف دا بي مهنية وحسم قانوني ومستندات.. بدون ماتدي مساحة للظلم واستغلال النفوذ !!

من ناحية انسانية اتضح لي خلال الثلاثة سنوات الماضية دي إنو البشير دا كان واطي عمل السودان تحت رجلو..
وشايل نار فوق كفّو..
ومتحمل أذية البسوى والما بسوى وكان خاتي كل فار في جحرو .. وكان ممشيها كان طلس كان صحي صحي.. وكلامي دا أي واحد فيهم وفيكم مابيقدر ينكروا..

✍️
(من ناحية رجالة) مفترض كل ضابط مركب رتبة في كتفو يخجل من نفسو ويخجل من ضميرو ويخجل من المكوة الكاويها.. ويخجل من العلامات الخاتيها..
ويتُف في وشو ألف مره وهو بشاهد الصورة دي

*(من ناحية رجالة برضو) مفترض الضباط يستحوا من المشهد دا وخصوصاً بعد وضوح الرؤية والرواية حول حكاية الثورة والتغيير والطلس دا..
ويكونوا أولاد ناس وعندهم نخوة وموقف ورجالة يسطرها التاريخ ويقيفوا ضد المهزلة دي ويردوا دَيْن (صدر تحت توقيع القائد العام للقوات المسلحة) وبيها بقيت (سعادتك)

*(من ناحية رجالة) الزول دا أبوكم والله كان دفنتوا دقن وكان بقيتوا خايبين الزول دا أبوكم…
هو الدربكم وهو العلمكم وهو الأداكم الرُتب وهو الفتح ليكم الخير البتتجاروا وراهوا دا وهو الصنع أمثالكم وهو العمل تفتيش لطابور تخريجك وهو الصادق ع رتبتك !!

*(من ناحية رجالة) إنتو كضباط محتاجين تبقوا رجال حبة.. وتردوا الدين العليكم،،، كيف وبأي طريقة؟! دي بتعرفوها إنتوا براااااكم
…..
تبيان توفيق