النيل الالكترونية-حوار
في حديث خاص لصحيفة النيل الالكترونية فتحت الاعلامية والفنانة سلافة مكي قلبها وتحدثت عن بدايتها الفنية وتحولاتها من الصحافة الي الدراما وتجربتها في مسلسل “سكة ضياع”إضافة إلى رأيها في أوضاع الفن والمجتمع ومشاريعها القادمة
سيرة ذاتية؟
خريجه الخرطوم الاضافيه اعلام
عملت بجريده الدار والشاهد واليوم التالي
ناشطه طوعيه في عدة منظمات
في السودان وفي مصر.
عضو في منظمه ابناء الوطن لدعم الاسر السودانية.
تجربة التمثيل كيف وجدتي نفسك فيها؟
اقدر اقول انو انا ممثله ضلت طريقها للصحافه
البدايات في مسرح المدرسه وبعدها الانشغال بتفاصيل الحياة العرس البيت العيال..الا انا جات الفرصه بمشاركتي في مسلسل “سكه ضياع” وكانت ضربة البدايه والحمدالله المسلسل اخد رواج كبير لانو طرح قضيه من المسكوت عنها والان انا في طريقي الدرامي اتلمس الخطى اجد نفسي مستمتعه بما أقدمه.
مصعب عمر” زول سغيل”؟
مصعب شخصيه معروفه قدم برنامج ونجح فيهو اقتحم العمل الدرامي وحاول يثبت نفسه كممثل ومنتج
ولكن بفتكر انو كانت تجربه صعبه بالنسبه ليهو لانو اشكاليات كتيره وقفت في طريقه من ضمنها الماده لانو كونك تتنتج مسلسل لازم تكون مستعد بنسبة ١٠٠٪ لتكلفة الانتاج والا سوف تفشل.
العوائد المالية في التمثيل؟
قد تندهش لو قلت ليك انا مااخدته ولا جنيه من مسلسل سكه ضياع وكذلك ود المك وهروب قسري
كتير من الاصحاب بقولو لي اها. قبضتي المليارات فبضحك
الدرامين فقراء بالدليل انو كم من ممثلين توفاهم الله ولايملكون الاحب الناس لهم.
لماذا توقف مسلسل عصب هش قبل اكتمال الحلقات؟
كما ذكرت عشان تنتج مسلسل ولا فيلم لازم تكون مستعد لتكلفه الانتاج كلها من اصغر تفاصيلها
هروب قسري ل مصعب عمر كانت احد الاسباب اشكالات ماديه
و المسلسل جميل جسدنا فيهو الواقع المرير لانتهاكات الدعم السريع تعبنا وساهرنا، كانت أمانينا أن يطلع عمل يكون من ضمن الاعمال الحاضره في ذاكرة الاجيال القادمه لحقبة تاريخيه
نحن شعب محارب من عده بلدان ونحن الحاضرين ومن حق الاجيال القادمه نوثق ليهم تاريخ يرسمو بيهو طريقهم.
القوات المسلحه الباسلة؟
ياسلام علي قواتنا الباسله علي صمام امان بلدنا علي الدرع الحمانا. وجاب لينا الامان. بجهده وجهاده وصبره علي الجوع والعطش وظلم .
ناس مغيبه عن حقيقه انو
دا جيش وطن اسمه السودان
ما خاض حربا الا انتصر
جيش قدم شهداء عزاز علي اهلهم وعلي وطنهم جيش صابر علي نقص الانفس والثمارات دا جيش كلنا نقيف تعظيم سلام جلال
الشكر. لكل جنودنا. في معركه الكرامه العادو لينا كرامتنا
ومن هنا برسل لسعادة الفريق عبدالفتاح البرهان نجمه انجاز وصوت شكر ونحن معاك لاخر الطريق
ولهيئة الاركان ياسر العطا وكباشي.
كلمة للشعب السوداني بشكل عام وللمجتمع الفني بشكل خاص؟
اكتشاف مذهل علي انو نحن كشعب سوداني لدينا ايمان ويقين واحتساب بنسبه كبيره جدا.
بالرغم من كل ماحصل من نزوح وسرقة اموال ونهب كل ما نملك حتي. ذكرياتنا
صورنا طفولتنا وطفولة اولادنا
ريحه توب امك الخاتهو كل ما تفتحي دولابك تترحمي عليها
حاجاتنا البسيطه الركن الهادي الكنت بترتاح فيهو في بيتك فقتو
صبرنا واحتسبنا واتعايشنا تجاوزنا المحن
رساله بسيطه
خلينا . نتكاتف ونتراحم ونحب بلدنا بجد ماشعارات تكتب علي صفحاتنا. في الميديا ننزع التحزب والقبليه
عشان نبني سودان يسع الجميع.
ورسالتي للمجتمع الفني
التكاتف ونحب بعض ونريد الخير لبعضنا
نبعد عن الحسد
نشجع بعض
اتصل علي زميلك. بارك ليهو نجاح عمله
فرحو بعض بالتواصل افقدو الدرامين القدمو للشاشه السودانيه اجمل الاعمال.
